Sigmar Gabriel na vul betg succeder ad Angela Merkel

Il schef da la SPD Sigmar Gabriel na vul betg daventar chancelier tudestg. Quai rapportan pliras medias en Germania sa referind sin infurmaziuns da politichers da la SPD suenter ina sesida da fracziun.

Sigmar Gabriel (sanester) e Martin Schulz (dretg) Bild in Lightbox öffnen.

Legenda da maletgs: Sigmar Gabriel (sanester) propona Martin Schulz (dretg) sco candidat da la SPD per succeder a Angela Merkel. Keystone

Il socialdemocrat Gabriel proponia percunter sco candidat da la SPD Martin Schulz. Schulz era fin qua president dal parlament da l'Uniun Europeica.

Schulz duaja era daventar president da la partida SPD, ha Gabriel ditg a la sesida da fracziun da l’SPD a Berlin. Gia avant aveva las medias «Stern» e «Die Zeit» rapporta che Gabriel renunzia sin ina candidatura.

Sco Gabriel ha ditg al magazin «Stern» na candideschia el betg perquai che las schanzas da Schulz sajan pli grondas. Fin uss valeva Gabriel sco il pli pussaivel candidat ord las retschas da l’SPD. Ma tenor l’agentura da novitads tudestga (DPA) vul el uss daventar minister dal exteriur.

Schulz senza experientscha en la politica naziunala

Martin Schulz (61) n’ha nagina experientscha en la politica naziunala. Uschia sesa el dapi il 1994 en il parlament europeic ed era la fin il president dal parlament. Tenor las retschertgas n’è la SPD lunsch davos la CDU da Angela Merkel.

RR novitads 16:00