En la Germania conferman ils resultats finals da las elecziuns las calculaziuns. En il Bundesland Baden-Würtemberg han ils Verds cun lur primminister Winfried Kretschmann extendì lur posiziun en il parlament sin passa 32%. Kretschmann è l'emprim e sulet schef verd a la testa dad in stadi federativ. L'um da 72 onns è dapi il 2011 en uffizi. La CDU percunter ha pers vuschs e cuntanscha anc radund 24%. Ils ultims tschintg onns han ils Verds mintgamai fatg ina coalliziun cun ils cristiandemocrats.
Er a Rheinland-Pfalz na datti naginas midadas: ils Socialdemocrats cun la primministra Malu Dreyer resta la pli ferma partida cun bunamain 36% da las vuschs. La SPD ha pers levet vuschs, entant ch'ils Verds e la FDP han gudagnà vuschs. Tuttina, la SPD resta la pli ferma partida. Igl è da spetgar ina nova ediziun da la coaliziun d'ampla cun SPD, FDP ed ils Verds. La CDU ha cun 27,7% da las vuschs pers sustegn en Rheinland-Pfalz. I sa tracta qua schizunt dal mender resultat che la CDU ha fatg en quest Bundesland.
Schleppa per la CDU
En omadus stadis federativs datti uschia ina schleppa per ils Cristiandemocrats – la partida da la chanceliera tudestga: Angela Merkel. I sa tractia da victorias persunalas dals primministers, declera il secretari general da la CDU Paul Ziemiak la schleppa da la CDU.
In motiv per il grond minus dals Cristiandemocrats vegn probabel ad esser il manegement da la pandemia da corona, sco er l'affera da mascras, nua che plirs politichers da la CDU èn s'enritgids persunal entras fatschentas dubiusas.