Il resultat vegn valità sco midada politica istorica, da furmar ina regenza vegn ad esser grev. La presidenta da Sinn Fein, Mary Lou McDonald ha annunzià da far discurs cun partidas pli pitschnas davart ina coaliziun da regenza. Sche quai gartegia, quai che na vegn betg spetgà, pudessi bainbaud dar in referendum davart ina reuniun da l'Irlanda cun l'Irlanda dal nord.
Il Brexit da la Gronda Britannia che banduna l'UE n'ha dentant betg giugà ina rolla tar las elecziuns. Be 1% da las votantas e dals votants han dà en che quai saja stà ina raschun per dar giu lur vusch. Bler pli pesant èn stads temas sco la sanadad, abitar e la renta.
Per il primminister Leo Varadkar èn las elecziuns dischillusiunantas. Ch'el po anc restar en ses uffizi n'è betg probabel. Cun Fine Gael maina el ina regenza da minoritad che vegn tolerada dal schef da la Fiana Fail en opposiziun, Micheál Martin. Sche questa collavuraziun vegn manada enavant, n'è anc betg cler.
RTR novitads 06:00