Siglir tar il cuntegn

Exteriur Elecziuns Italia: Trais blocs cumbattan per maioritad

L'Italia elegia questa fin d'emna in nov parlament. Trais gronds blocs politics cumbattan per la maioritad e quai cun far bleras empermischuns.

Il colosseum a Roma.
Legenda: Il colosseum a Roma. Keystone

Ils 4 da mars elegia l'Italia ses nov parlament. Trais gronds blocs politics cumbattan per ina maioritad per lura er pudair furmar ina regenza.

  • Allianza center dretg

L'allianza ord la plitost centristica «Forza Italia», la populista da la dretga «Lega» ed ils dretg-naziunals «Fratelli d'Italia» vegn tar las davosas retschertgas sin 36% da las vuschs.

  • Movimento 5 Stelle

Il moviment fundà dal comicher Beppe Grillo vegn sin radund 28% da las vuschs.

  • Partito Democratico

La partida è il mument a la testa ed ha cun Paolo Gentiloni er il primminister, tenor las retschertgas vegn ella dentant be pli sin 23% da las vuschs.

Tenor il correspundent dad SRF en l'Italia, Franco Battel, stoppian ins interpretar a moda precauta questas retschertgas. Blers Talians na sappian numnadamain anc betg a tgi ch'els vulan dar lur vusch.

40% per furmar regenza

Per pudair furmar ina regenza duvrass in da quels blocs radund 40% da las vuschs, tenor Franco Battel, saja quai dentant probabel che nagins da quels blocs cuntanscha quai. Perquai saja quai er pussaivel ch'i dat lura ina coaliziun gronda.

Empermess vegn bler

Tut las partidas empermettan da sbassar las taglias, quai è attractiv en l'Italia, nua che las taglias èn gia adina stadas fitg autas. Sper quai empermettan blers er che las rentas vegnian pli autas. Er quai è in bun argument en in pajais ch'ha fitg blers pensiunads.

Tge fa Silvio Berlusconi?

El tutga simplamain vitiers tar elecziuns en l'Italia: Silvio Berlusconi. Gia quatter giadas è el stà primminister da l'Italia. Tar las elecziuns actualas n'è quai dentant betg pussaivel. El è numnadamain serrà fin il 2019 per uffizis politics, quai pervi da fraud da taglia. Davent da l'auter onn, cura Silvio Berlusconi ha 82 onns, fissi dentant pussaivel ch'el vul puspè surprender in uffizi. Schef da la partida «Forza Italia» è el numnadamain anc adina. E quella pudess vegnir ina da las fermas forzas en il nov parlament.

RR actualitad 11:00