Il topcandidat dals hardliners ha survegnì almain 17,8 milliuns vuschs – 28,6 milliuns persunas èn stadas a l'urna en il pajais. Raeisi succeda a Hassan Ruhani ch'ha suenter duas periodas d'uffizi betg pli dastgà candidar. La saramentaziun dal nov president duai dar l'avust.
Il schef da giustia aveva pers avant quatter onns envers Ruhani. Questa giada è ses viadi stà pli simpel – er perquai ch'el ha survegnì sustegn dals manaders religius dal pajais. Il gremi electoral ha bloccà differents cuntracandidats. Quai ha procurà per grondas dispitas, er en las atgnas retschas da Raeisi.
Raeisi vala sco hardliner
Cun il schef da giustia spetgan plirs ina midada politica en il pajais. I vegn spetga che Raisi na cuntinuescha betg cun la politica moderada da Ruhani. Sco procuratur public, derschader e schef da giustia ha Raeisi paucas experientschas politicas.
Las sfidas èn dentant gia prontas – tranter auter sto el decider sur dal futur da la cunvegna atomara. La situaziun economica èn il pajais è tendida, cunzunt pervia da las sancziuns dals Stadis Unids.
