En la Pologna ha l'opposiziun cuntanschì la maioritad tar las elecziuns parlamentaras da la fin d'emna. Bain daventa la partida regenta PiS, cun var 36% da las vuschs la forza ferma en il parlament, annunzia la cumissiun electorala. Ella tegn pia circa 190 dals 460 sezs en il parlament.
L'Allianza electorala liberal-conservativa dal manader da l'opposiziun Donald Tusk ha survegnì 30,7%. La Terza Via, in'allianza dal center, è vegnida sin 14,4%, la Nova Sanestra ad 8,61% e la Confederaziun extrema a la dretga a 7,16%.
Tusk ha ussa la rolla da clav. L'anteriur president dal Cussegl da l'UE po far ina regenza cun la Terza Via ed la Nova Sanestra e terminar la dispita permanenta cun Brüssel. L' um da 66 onns ha uschia bunas schanzas da puspè daventar president da la regenza e remplazzar il titular d'uffizi Mateusz Morawiecki. Tusk è gia stà dal 2007 fin il 2014 schef da la regenza.