Siglir tar il cuntegn

Header

cuntegn

Elecziuns Thüringen Victoria istorica per la Sanestra

Tar las elecziuns da parlament en il Bundesland Thüringen è la partida da sanestra dal primminister Bodo Ramelow daventada cun 31% la pli ferma forza. Quai tenor resultat provisoric. Per l'emprima giada è la Sanestra la pli ferma forza politica en in Bundesland.

  • En il Thüringen è La Sanestra cun 31% per l'emprima giada la ferma partida en in Bundesland.
  • La partida populistica a dretga Alternative für Deutschland (AfD) è creschida fermamain, cumpareglià cun il 2014 e vegn sin 23,4%.
  • La CDU cuntanscha 21,8%, la SPD 8,2%. FDP e Verds han dumagnà be stgars ils 5%.

Dentant ha la coaliziun cotschen-cotschen-verda da Sanestra, Socialdemocrats e Verds pers sia maioritad. La CDU ch’era fin uss la pli ferma partida ha realisà ses mender resultat. Segunda forza daventa la AfD cun passa 23%. Pers vuschs ha era la SPD che vegn anc sin bun 8% da las vuschs. Ils Verds èn stads constants tar bun 5%.

audio
Bunura: Elecziuns istoricas en il Thüringen
ord Actualitad dals 28.10.2019. Maletg: RTR
laschar ir. Durada: 1 minuta 7 Secundas.

Regenza senza Sanestra ed AfD betg pussaivla

Furmar ina nova regenza pudess uschia esser difficil cunquai ch'i na dat strusch ina maioritad senza partida sanestra u senza AfD. Per ina uschenumnada constellaziun da «Simbabwe» da CDU, SPD, Verds e FDP na tanschess quai betg.

Bodo Ramelow sa senta confermà

A l'ARD ha il primminister Ramelow ditg ch'i dettia ina clera incumbensa da reger per sia partida. El prendia encunter questa incumbensa. I saja uss da spetgar giu il resultat definitiv. I saja anc memia baud da pudair dir, co ils discurs per furmar ina regenza stoppian esser.

Passa 1,7 milliuns persunas cun il dretg da votar èn stads clamadas a las urnas. La participaziun a l’elecziun è stada tar 65%.

RR novitads 06:00

Artitgels legids il pli savens