Trais Rumantschas ed in Rumantsch che vivan en ils Stadis Unids raquintan co els resentan las elecziuns e co els vesan ils dus candidats Hillary Clinton e Donald Trump.
Jeanette Pringle
Dapi 35 onns viva Jeanette Pringle gia en ils Stadis Unids da l'America. Oz viva ella a Niantic, ina citad che giascha duas uras davent da New York. Sin via na saja il cumbat electoral strusch vesibel. Nagins placats e naginas bandieras na pendian per il quartier enturn. Per la dunna da 56 onns èn las elecziuns da quest onn insatge extraordinari.
La glieud na ristga betg propa da dir sch'els èn per Trump u Clinton
Perquai pendian probabel era nagins placats. Ils americans na discurrian en general betg usche gugent da politica. Quai fetschian els pli gugent davos lur quatter paraids.
Mirco Raguth-Tscharner
Dapi quatter onns viva Mirco Raguth-Tscharner, ch'è uriund d'Aschera en Purtenza, en il stadi american da Missouri. La frequenta el ina scola da teater. Teater na resenta el dentant pil mument betg mo en sia scola mabain era en il cumbat electoral tranter Clinton e Trump.
Il cumbat tranter Clinton e Trump è in vair teater
Il giuven da 23 onns viva a Cape Girardeau en il stadi da Missouri ch'è en l'intern da l'America. En la citad hai blers purs che voteschian plitost republican. Quels sajan leds sch'i na dettia naginas midadas pli grondas en lur vita.
Agiua Heath
En la chapitala americana, Washinton DC viva Agiua Heath. Ella è naschida e creschida si en ils Stadis Unids. Sia mamma è dentant da l'Engiadina e perquai discurra la dunna da 57 onns anc oz rumantsch.
Uschè grop sco quest onn èn las elecziuns anc mai stadas
Las elecziuns sajan adina puspè stadas in pau maltscheccas, uschia sco quest onn saja dentant anc mai stà. Agiua Heath che ha in bab afroamerican na sa betg chapir ch'insatgi sco Trump che discriminescha nairs, dunnas e minoritads ha pudì daventar candidata per il presidi american. Ord quai motiv dat ella sia vusch a Clinton.
Angela Hendry
Per Angela Hendry che viva ensemen cun ses um e ses dus uffants datiers da Dallas en il stadi da Texas è il cumbat electoral omnipreschent. En las medias na dettia per il mument nagut auter che Trump e Clinton.
Mintgatant hai jau elecziuns enfin las ureglias
Tut auter vesia quai dentant or en la citad da Dallas nua che la dunna da 34 onns, ch'è creschida si a Sedrun, viva. Ins vesia nagins placats dals candidats sco quai ch'ins enconuschia da campagnas politicas en Svizra. Plinavant percorschia Angela Hendry che betg tut ses enconuschents en l'America giajan a votar. Per blers na saja quai gnanc uschè impurtant sco quai ch'ins pudess pensar.
Qua la documentaziun
RR actualitad 11:00