Fertant che gnanc anc tut ils stadis federativs da l'America han furnì lur resultads definitivs, arrivan gia las gratulaziuns da tut il mund tar il nov president american.
Barack Obama ha gratulà a Donald Trump
Il president actual Barack Obama ha gratulà a ses successur Donald Trump per sia elecziun - annunzia l'emettur da televisiun CNN. Ils dus umens veglian sa scuntrar damaun ha ditg president Obama.
Russia: Putin è stà in dals emprims gratulants
Sco in dals emprims schefs da stadi ha il president russ Wladimir Putin gratulà al nov president american Donald Trump.
En in telegram haja Putin exprimì sia speranza che las relaziuns tranter ils dus pajais sa megliereschian. Durant il cumbat electoral american aveva il president russ ludà Trump.
UE: Rinforzar las relaziuns trans-atlanticas
Era l'Uniun europeica ha gratulà al nov president. Il president dal cussegl da l'UE Donald Tusk ed il schef da la cumissiun da l'UE Jean-Claude Juncker vulan tant pli spert in inscunter suprem per rinforzar las relaziuns trans-atlanticas.
Il president Trump vegn ad esser in auter ch’il cumbattant electoral Trump, di il president dal parlament d’Europa, Martin Schulz, en in'intervista a la televisiun (da vesair en la galaria da video sura). Quai saja stà dad udir en ses emprim discurs presidial. I na vegnia betg ad esser simpel cun tut quai ch’ins haja udì en il cumbat electoral, cuntinua Schulz, sa mussa dentant persvadì ch’ins vegnia a returnar tar ina collavuraziun raziunala.
Svizra: collavuraziun constructiva
La Svizra vegnia a collavurar a moda constructiva cun la nova regenza americana ha ditg cusseglier federal Didier Burkhalter al radio da la Svizra romanda.
L'emprim dovria la nova regenza temp da chattar sia via. Pir lura saja pussaivel per la Svizra da sa far in parairi. Ed ella vegnia a defender ses interess e sias valurs - ha Burkhalter aschuntà (da vesair en la galaria da video sura).
Clinton: Suenter la gratulaziun telefonica n'ha ella betg pli s'exprimì publicamain
La contrahenta democrata Hillary Clinton haja gratulà a Trump en in clom da telefon, rapporta l'emettur american CNN. Suenter ü ella sa retratga da la publicitad sco quai che las agenturas sda e dpa rapportan.
RR novitads 11:00++
