Donald Trump ha refusà rapports da medias, tenor ils quals servetschs secrets russ hajan material engrevgiant sur dad el. La Russia n’haja mai empruvà dad influenzar el, ha Trump ditg davant las medias a New York.Quai a chaschun da sia emprima conferenza da medias sco president elegì dals Stadis Unids da l'America.
Reproschas encunter ils servetschs secrets
El renfatscha als servetschs secrets americans d’avair publitgà infurmaziuns falladas. Sa referind ad infurmaziuns da quels servetschs secrets avevan pliras agenturas americanas e britannicas rapportà che la Russia haja probabel infurmaziuns davart il nov president che pudessan metter el sut pressiun.
Attatgas da hackers russ
Durant la conferenza da medias ha Trump er fatg responsabel la Russia per las attatgas da hackers durant il cumbat electoral. En pli ha el preditg, ch’i na dettia naginas talas attatgas pli da vart da la Russia.
La Russia vegn a respectar nus pli fitg en l'avegnir.
Durant il cumbat electoral sco er suenter aveva Trump dentant anc dubità che Moscau stettia davos las cyberattatgas. Quai malgrà che plirs servetschs secrets dals Stadis Unids èn stads persvas che quai saja stà il cas.
En quest connex ha il president elegì annunzià da preschentar aifer 90 dis suenter sia entrada en uffizi in program che duaja proteger ils Stadis Unids d’attatgas da hackers. La raschun: «Mintgin hachescha nus. La Russia, la China – tuts», ha ditg Trump.
Empermischuns electoralas
Ultra da quai ha Trump repetì ina da sias empermischuns electoralas principalas: El vegnia a stgaffir las pli bleras novas plazzas da lavur insumma. La gestiun da sia atgna interpresa vegnia el a surdar a ses figls.
RR novitads 20:00