Siglir tar il cuntegn

Header

cuntegn

Elecziuns USA 2016 Trump e Clinton – duas vitas totalmain differentas

Sco giuven n'aveva Donald Trump (70) nagin interess vid la politica. Tut auter Hillary Clinton (68), schon sco giuvna era ella ina persuna engaschada ed a l’entschatta sustegneva ella la partida republicana. Different n'è dentant betg mo il curs da la vita politica tar Trump e Clinton.

«Jau vuless vegnir astronauta». Sco giuvna da 14 onns era quai il siemi da Hillary Clinton. Ella è s’annunziada tar la NASA. Cun l’argumentaziun che dunnas na possian betg vegnir astronauts, ha la NASA dentant refusà sia annunzia.

Hillary Clinton

Avrir la box Serrar la box
  • Naschida ils 26 d’october 1947 a Chicago
  • Dapi il 1975 maridada cun Bill Clinton
  • Mamma dad ina figlia

Uschia ha Clinton fatg ina carriera politica sco or dal cudesch. Ella è naschida a Chicago en ina famiglia, nua ch’il bab era republican e la mamma democrata. Sco giuvna sustegna ella la partida republicana.

Ses um Bill Clinton emprenda ella d’enconuscher l'onn 1971 durant il studi giuridic. Politicamain activa per ils democrats vegn ella dentant pir suenter ses temp sco First Lady els onns 90. La mamma dad ina figlia vegn elegida el senat dals Stadis Unids. E durant 4 onns (2009-2013) è la dunna ambiziusa ministra da l'exteriur.

Donald Trump e sia carriera a Hollywood

Fertant che Hillary Clinton era schon sco giuvna politicamain activa, na giugava la politica per Trump da lez temp nagina rolla. Donald Trump è naschì a New York City, sco figl d’impressaris d’immobilas. Gia sco giuven era la finamira dal bab da 5 uffants, da vegnir in retg d'immobiglias. Cun immobiglias ha el lur era fatg blers daners.

Donald Trump

Avrir la box Serrar la box
  • Naschì ils 14 da zercladur 1946 a New York City
  • Stà maridà 3 giadas
  • Bab da 3 figls e 2 figlias

Donald Trump ha silsuenter perfin fatg carriera da film a Hollywood. El ha giugà rollas pitschnas en films sco «Kevin allein in New York» u en serias sco «Sex and the City» u «Der Prinz von Bel Air».

Cumenzà a far in zic politica ha il milliardari pir en ils onns 80. Ma propi collià cun ina partida n'è el mai stà. Il 1987 è el entrà en la partida dals republicans, il 2001 tar ils democrats ed il 2009 puspè tar ils republicans. Trump na dovra, da principi, nagina partida per dir sia opiniun.

Artitgels legids il pli savens