Siglir tar il cuntegn

Header

cuntegn

Elecziuns USA 2016 Trump sa stgisa per remartgas vulgaras

Suenter che la “Washington Post” ha publitgà in video cun remartgas vulgaras da Donald Trump è il candidat per il presidi american sut squitsch. Curt suenter la publicaziun dal video ha Trump reagì cun ina da sias raras exculpaziuns.

Il video deriva da l’onn 2005. Quella giada aveva Trump spetgà en in bus per ina cumparsa en televisiun. Ina part da quel temp da spetga ha el passentà cun diversas remartgas pulitamain vulgaras davart dunnas – ch’èn dad udir uss pervi dad in microfon ch'era avert quella giada.

l'ura davant ses «Trump Tower» a New York City, fotografada curt avant las 12:00.
Legenda: Muments critics per Donald Trump - l'ura davant ses «Trump Tower» a New York City, fotografada curt avant las 12:00. Keystone

Trump sa stgisa

El haja ditg quai, e quai saja stà fallà, uschia s’exculpa Trump en in video che sia squadra da cumbat electoral ha publitgà. El empermettia d'esser en il futur in meglier carstgaun. Enpli di el en ses video d’exculpaziun, che quai ch’el haja ditg là na saja tipic per el. Ed el na haja mai pretendì ch’el saja ina persuna perfetga.

Termin da publicaziun brisant

Durant sia campagna electorala era Trump adina puspè vegnì sut squitsch pervi da sias remartgas sexisticas. Questa giada fa l’actualitad ellas anc pli brisantas. Il video è vegnì publitgà il di avant il segund duel da televisiun encunter sia adversaria democrata Hillary Clinton.

RR novitads 08:00

Artitgels legids il pli savens