La candidata democrata Clinton saja entant sa profilada cun fatgs e cifras, a moda cumpetenta e disziplinada. Ella ha adina puspè provocà ses rival republican. Trump ha bain cumenzà bain, pareva lura entant gnervus, ha savens interrut Clinton. El è stà pli emoziunal, pli agressiv e main concentrà.
La debatta è stada l'emprima da trais. Ella vala sco in dals eveniments politics ils pli gronds dals ultims onns. Fin 100 milliuns persunas han persequità l'emprima debatta.
Il rassissem è in punct central en la debatta electorala
Clinton ha accentuà ch'i saja anc adina uschia ch'ils "nairs ed alvs" na vegnian betg tractads medem. I saja impurtant da puspè bajegiar si la fidanza tranter las communas e la polizia. Tuts stoppian sa tegnair vid las leschas.
Ins stoppia prender davent las armas a quels che n'hajan betg da purtar ellas, di Clinton. Donald Trump è d l'avis che l'America dovria dapli "law and order", pia dapli lescha ed urden.
Il cumbat cunter l'SI
L'anteriura ministra per l'exteriur veglia sa metter en per in pli ferm cumbat cunter il Stadi islamic. Las attatgas or da l'aria stoppian vegnir intensivadas. I saja er da far chatscha sin il manader da la miliza da terrur.
Trump ha fatg remproschas a la regenza d'Obama. I saja vegnì fatg gronds sbagls tar l'occupaziun da l'Irak. El ha dentant cuntraditg a Clinton ch'el na saja betg in ristg per la segirtad dals Stadis Unids sch'el survegniss il commando da l'armada dals Stadis Unids. El haja passa 200 admirals e generals da sia vart. El ha era accentuà ch'el saja stà fermamain encunter l'invasiun da l'Irak. Questa pretensiun è dentant vegnida dementada pliras giadas.
L'affera d'e-mails
Trump ha ditg ch'el saja promts da publitgar ses documents da taglia sche Clinton faschaja public ils 33'000 e-mails ch'ella haja tramess sur in server privat. Quels haja la polizia federala dals Stadis Unids (FBI) betg chattà. Tradiziunalmain fan ils candidats per il presidi public lur documents da taglia. Clinton ha fatg quai. Trump refusa quai vehementamain uschia che Clinton è da l'avis ch'el haja da zuppar insatge.
Clinton conceda dentant d'avair fatg in sbatg pertutgant ils e-mails. Quai na saja betg stà prudent.
Clinton sco victura
Emprimas retschertgas mussan che passa 60% da las persunas che han persequità la debatta vesan Clinton sco victura.
RR novitads 06:00