Che las elecziuns per il presidi american sa sviluppan en tala maniera a disfavur da la candidata democrata Hillary Clinton è ina gronda surpraisa per observaders e commentaders sin tut il mund.
L'anteriura favorita è svanida da la publicitad
Hillary Clinton haja telefonà e gratulà, ha raquintà il nov president Trump tar sia emprima cumparsa presidiala. Gia avant aveva ses schef da campagna, John Podesta, clamà giu la party electorala en il Jacob K. Javits Convention Center en il vest da Manhattan a New York e cusseglià als aderents da Clinton dad ir a chasa. Hillary Clinton na vegnia betg pli a s’exprimer en la notg sin mesemna.
Clinton è rivada al plafond da vaider
Clinton svaneschia silenziusamain da la tribuna politica, scriva la reportra da dpa e sda a Washington. Ella haja cumbattì durant tut sia vita per quest mument, per vegnir l’emprima presidenta dals Stadis Units. Ed ussa haja ella pers encunter in demagog ed ina fulla dad uschenumnads umens alvs ravgentads, scriva la sda vinavant.
Represchentanta dad in temp dad elitas e dinastias
Clinton è stada sco First Lady (1993-2001), senatura e ministra da l’exteriur (2009-2013). Radund 25 onns en la publicitad politica. Ella saja stada ina candidata logica per vegnir presidenta, n’haja dentant betg pli gì lieu en il temp dad oz.
Cun sa decider cunter ella hajan sa decidì ils Americans e las Americanas encunter l’elita e las dinastias politicas. La glieud saja unfisa da Clintons e Bushs en la Chasa Alva.
RR novitads 09:00++
