Clinton-mails – critica envers directur dal FBI

La discussiun pli actuala en l’affera da Clinton-Mails: Ha James Comey FBI cuntrafatg a la lescha cun render public novs mails da Hillary Clinton mo 11 dis avant las elecziuns? Quai dumonda Harry Reid, il manader democrat da la maioritad en il senat american.

Portrait dad el. Bild in Lightbox öffnen.

Legenda da maletgs: Ha el cuntrafatg la lescha? Il directur dal FBI, James Comey (maletg: december 2015). Keystone

Sursiglir cuntegn supplementar

La «Hatch Act»

La lescha americana scumonda ad emploiads dals Stadis Units e da ses posts da malduvrar lur uffizi per far politica. Quai pudess uss esser stat il cas tar il directur dal FBI, James Comey, e sia publicaziun dals Clinton-mails endisch dis avant l'elecziun. La renfatscha fa Harry Reid, il manader democrat da la maioritad en il senat.

Ils mails, che stan actualmain en il center da la campagna electorala, sajan stads enconuschents al FBI dapli pliras emnas. Quai rapportan tant la Washington Post sco era CNN sa referind sin circuls giuridics. Sco ch’il schef da l’FBI James Comey di dentant, saja el vegnì a savair dals mails pir il di avant ch’el aveva decidì da render publica lur existenza.

Cun quest'annunzia indesch dis avant l’elecziun n’haja Comey forsa betg resguardà la lescha che di che l'FBI na dastga betg influenzar las elecziuns. Quai ha ditg il manader da la maioritad democratica en il senat. Comey n'ha betg prendì posiziun tar quella rinfatscha.

Il directur dal FBI, James Comey, aveva publitgà il venderdi passà, ch’il FBI haja chattà ulteriurs mails dispitaivels da la candidata pel presidi american. Questa infurmaziun brisanta ha causà nov turnigl en il cumbat electoral american.

RR novitads 07:00