Siglir tar il cuntegn
Inhalt

Elecziuns USA 2016 Cumbat electoral american - per ina giada senza temas religius

Temas religius giogan el cumbat electoral tranter Hillary Clinton e Donald Trump betg ina gronda rolla. Las vuschs da las gruppas evangelicalas èn dentant impurtantas.

Per rimnar vuschs tar gruppas evangelicalas va Hillary clinton en baselgias.
Legenda: Hillary Clinton è methodista: Per rimnar vuschs tar gruppas evangelicalas ha ella visità baselgias. En il cumbat electoral vai però darar per religiun. Reuters

Els Stadis Unids da l’America è la religiun impurtanta per l'identitad d'ina persuna. Ins enconuscha adina l’aderenza religiusa d'in candidat. Donald Trump è presbiterian. Hillary Clinton è metodista. Omadus èn pia protestants.

Auters focus el cumbat electoral

Ils temas centrals dal cumbat electoral èn dentant betg religius. Quai di Marie-Theres Mäder, ch’è scienziada da religiun a l’universitad da Turitg e sa fatschenta cun la rolla da la religiun en las elecziuns americanas.

Ni il scumond d’abort ni la lètg tranter um ed um ni dunna e dunna èn stads impurtants el cumbat electoral. Malgrà quest fatg èn Hillary Clinton e Donald Trump adina puspè stads en baselgias per far cumbat electoral di la scienziada da religiun.

Evangelicals: Impurtanta gruppa

La gruppa dad alvs evangelicals ch'èn enturn 20% dals electurs registrads èn per gronda part per in scumond d’abort ed encunter la lètg tranter omosexuals. Tenor Mäder èn els, schebain che Trump na sa posiziuneschia betg cler tar quests temas, plitost per Trump.

Il motiv saja, ch'ils evangelicals sajan era fitg conservativs en dumondas da l’economia, da la lescha d’armas e da la migraziun. E quels temas èn impurtants en il cumbat electoral e tar ils evangelicals fa il conservativ Trump punts.