In onn dapi il grond triumf da Donald Trump

Ils 8 da november 2016 è stà il di da success per il milliardari e showman Donald Trump. La populaziun americana ha elegì il republican sco successur da Barack Obama. Tge ha l'um da 71 onns prestà l'ultim onn? Nus dain in sguard enavos.

Per blers èsi stà ina sensaziun u almain ina surpraisa. Avant exact in onn è il republican, milliardari e mogul d'immobiglias vegnì elegì sco nov president american. El ha gudagnà cunter la democrata Hillary Clinton.

Igl è stà in onn intensiv per Trump. Quasi mintga pass da l'um da 71 onns è vegni persequità. Cun sia moda e maniera ha el procurà ch'i ha strusch dà in di ch'el n'ha betg procurà per lingias grassas en las gasettas, al radio u a la televisiun.

Co èsi da viver cun Trump a la testa?

Claudius Vincenz ch'abitescha en il stadi federativ da Michigan en il nord dals Stadis Unids vesa nagut positiv vid ils emprims mais cun Trump a la testa. Igl um ch'è oriund d'Andiast ha gia participà a demonstraziuns cunter il president. Di per di regia ina tscherta tema, di Vincenz. El haja tema che Donald Trump fetschia in di insatge nunponderà cun la cassa da malsauns u cun la protecziun da la natira.

«  Blera glieud n'ha betg pli tema da mussar ch'els èn rassists. »

Claudius Vincenz
abitescha ad Ann Arbor (Michigan)

A Claudius Vincenz è dà en egl ils davos mais, ch'ins vesa pli e pli savens la bandiera da la Confederaziun durant la guerra d'independenza (1861-1865). Ina chaussa ch'ins na veseva normalmain betg en ils stadis en il nord dals Stadis Unids.Tenor Claudius Vinzenz ch'è professur a l'universitad da Michigan saja quai in segn, che blers n'hajan betg pli tema da mussar, ch'els sajan rassists.

«El ha creà plazzas da lavur»

Anita Turner viva ad Austin en il stadi federativ da Texas ed ha elegì Donald Trump avant in onn. Sia bilantscha dal nov president è maschadada. A la dunna ch'è oriunda da Trun plascha che Trump guarda sin l'economia. El haja, per exempel, creà plazzas da lavur en l'industria da cotgla.

«  Sch'i fiss la medema situaziun sco avant in onn elegess jau anc ina giada Trump. »

Anita Turner
abitescha ad Austin (Texas)

Tuttina dettia era puncts, nua ch'ella na saja betg cuntenta. La refurma da sanadad Obamacare haja Trump anc adina betg abolì, malgrà ch'el haja empermess quai. Plinavant disturbia Anita Turner vid il president, ch'el na sappia betg lavurar ensemen cun persunas che na plaschian betg ad el.

RR actualitad 12:00