Swing States – tge è quai?

California è cleramain democratic ed in stadi en il sid sco Alabama cleramain republican. E Swing States? Quai èn ils stadis americans che n'elegian betg cleramain democratic u betg cleramain republican. Igl è dentant ils stadis che pon decider il cumbat electoral.

Ils Swing States èn adina puspè auters. Bild in Lightbox öffnen.

Legenda da maletgs: Ils Swing States èn adina puspè auters. RealClearPolitics

Arizona, Florida, Indiana, Iowa, Nevada, New Hamsphire, North Carolina ed Ohio èn stadis ch'ins astga numnar Swing States quest onn. En quels stadis na datti betg ina preferenza per ina partida. I èn stadis che èn in zic tranter sutgas a bancs. Tscherta glieud sustegna la democrata Hillary Clinton ed auters il republican Donald Trump.

En ils Swing States vegni spezialmain fatg cumbat electoral. Cunquai ch’i n'è betg cler tge candidat che survegn las vuschs en quels Swing States, fan Trump e Clinton bler reclama en quest stadis. Igl è ils stadis, nua ch’i vegn dà ora ils blers daners. Spezialmain il stadi da Florida è quasi mintga quatter onns fitg cumbattì.

Sursiglir cuntegn supplementar

Swing states 2016

  • Arizona
  • Florida
  • Indiana
  • Iowa
  • Nevada
  • New Hampshire
  • North Carolina
  • Ohio

«Sche Trump na gudogna betg a Florida vegni fitg grev per el»

Quai di il politolog ed expert da l’America, Louis Perron. Florida è il pli impurtant stadi, cunquai ch’igl è il Swing State cun las pli bleras vuschs. Florida saja propi in «must win» per Trump.

Interessant è ch’ils Swing States èn adina puspè in zic auters. Arizona u North Carolina eran avant diesch onns anc republican, uss dentant èsi stadis fitg cumbattì. Arizona haja en ils davos 40 onns elegì sulettamain ina giada in candidat democrat. Ma, quest onn pudessi propi esser che Clinton gudogna ad Arizona.