Las retschertgas naziunalas da las ultimas emnas mussan in cler avantatg per il democrat Joe Biden. El maina cun fin a 10% avantatg sin Donald Trump. Pia, clera chaussa?
Questas retschertgas èn mo per part relevantas.
Quai ha da far cun il sistem d'eleger american. En mintga stadi federativ vegn elegì individualmain. Avant quatter onns ha Hillary Clinton survegnì dapli vuschs che Donald Trump, ma la cursa ha tuttina il milliardari fatg. Impurtant èsi perquai da gudagnar ils uschenumnads «Swing States». Quai èn ils stadis che n'elegian betg cleramain democratic e betg cleramain republican – per exempel Pennsylvania, Ohio u Florida.
Donald Trump – il president sco nagin auter
Donald Trump ha manà ils Stadis Unids sco betg in president avant el. El saja stà ils ultims onns in president consequent, di Peter Düggeli, correspundent da SRF a Washington. El è suandà a ses slogan «America first».
Donald rump, in president che ha empruvà da cuntanscher sias finamiras ch'el haja mess avant quatter onns. L'um da 74 onns ha mussà sias qualitads sco um da fatschenta.
El ha sbassà la taglia, spezialmain per interpresas e glieud ritga.
Persvas ses electurs ha Donald Trump er cun sia politica exteriura. Uschia è el extrà da la cunvegna atomara cun l'Iran u er da la cunvegna da Paris davart il clima.
Dà en egl durant la perioda d'uffizi è dentant er ses agir e ses da far. In bun exempel è la crisa da corona. Er suenter che Trump è stà infectà cun il virus, n'haja el betg prendì pli serius quel, di Peter Düggeli. Durant ils ultims onns haja Trump er manchentà d'unir il pajais. El saja stà davent da l'entschatta il president che haja simplamain politisà per l'atgna basa e betg per l'entir pajais american.
Il schurnalist da Cuira è dapi la stad 2015 correspundent da SRF a Washington D.C. Enconuschent è il Grischun er sco anteriur trenader da l'equipa naziunala d'unihockey.
Joe Biden – la veglia vulp
Il democrat n'è betg da cumparegliar cun il president en uffizi. Joe Biden politisescha quasi sia entira vita. Dal 1973 enfin il 2009 è el stà en il senat american, silsuenter il vice-president da Barack Obama. El è, per uschè dir, ina veglia vulp en la politica americana.
Il politicher rutinà ha stuì viver cun pliras tragedias persunalas. El ha pers sia dunna ed ina figlia ils onns 70 tar in accident dad auto. In figl è mort il 2015 vid in tumor dal tscharvè.
El è in politicher empatic che sa colliar cun persunas che han sez er gì da cumbatter cun tragedias.
Joe Biden è ina persuna che tschertga savens il consens. El sa preschentia er sco persuna che saja buna da puspè unir ils Stadis Unids. Peter Düggeli è dentant sceptic ch'el chatta era cumpromiss cun ils republicans tar temas impurtants sco la midada dal clima u la paja minimala. Plinavant saja quai in fatg ch'ina gronda part dals democrats na veglia betg pli cumpromiss.
In punct da discussiun tar Joe Biden è savens la vegliadetgna. Sch'el daventa president, ha el 78 onns cura ch'el surpiglia l'uffizi. Il democrat saja enconuschent ch'el scumbiglia magari cifras u ch'el stoppia magari studegiar in mument avant che dar resposta. Quai n'haja dentant betg be da far cun la vegliadetgna, di il correspundent dad SRF. Sco uffant balbegiava Joe Biden, uschia ch'el è atgnamain mai stà predestinà da far ina carriera politica.
Presidents dals Stadis Unids suenter la 2. guerra mundiala
| 1945-1953 | Harry S. Truman (democrat) |
| 1953-1961 | Dwight D. Eisenhower (republican) |
| 1961-1963 | John F. Kennedy (democrat) |
| 1963-1969 | Lyndon B. Johnson (democrat) |
| 1969-1974 | Richard Nixon (republican) |
| 1974-1977 | Gerald Ford (republican) |
| 1977-1981 | Jimmy Carter (democrat) |
| 1981-1989 | Ronald Reagan (republican) |
| 1989-1993 | George Bush (republican) |
| 1993-2001 | Bill Clinton (democrat) |
| 2001-2009 | George W. Bush (republican) |
| 2009-2017 | Barack Obama (democrat) |
| 2017- | Donald Trump (republican) |