Elie Wiesel è mort

Il scrivent che ha survivì ils champs da concentraziun Auschwitz e Buchenwald ha cumbattì durant sia vita cunter l'emblidar il holocaust. Sco quai ch'il lieu da commemoraziun Yad Vashem sco era medias israelianas rapportan, è Wiesel mort cun 87 onns en sia chasa a Manhattan.

purtret da Elie Wiesel Bild in Lightbox öffnen.

Legenda da maletgs: Elie Wiesel ha survivì ils champs da concentraziun Auschwitz e Buchenwald. Keystone

Plirs schefs da stadi han onurà il purtader dal premi Nobel da la pasch e survivent dal holocaust Elie Wiesel ch'è mort. Il president da l'Israel, Reuven Rivlin, ha onurà Wiesel sco cumbattant cunter mintga furma da odi. Il president american Obama ha numnà el ina gronda vusch morala da noss temp ed ina cunscienza dal mund.

Elie Wiesel tar la surdada dal premi Nobel 1986

0:10 min, dals 3.7.2016

Schurnalist, scrivent, professur

La mort da Wiesel ha sveglià cordoli sin l'entir mund. Elie Wiesel è naschì il 1928 en la Rumenia e survivì las sgarschurs dal holocaust en Germania sut Hitler. Ses geniturs e sia sora giuvna eran vegnids mazzads dals nazi. Durant blers decennis aveva il scrivent che viveva a New York cumbattì per la memoria dal holocaust. El ha scrit ovras sco «Die Nacht» u «Jude heute».

Suenter il 1945 aveva Wiesel studegià a Paris e lavurava sco schurnalist. Il 1956 è el lura stà correspundent da l’ONU. Pli tard è el stà professur per litteratura, filosofia e giudaissem al New York City College. Il 1986 ha el survegnì il premi Nobel da la pasch.

RR novitads 23:00