L'attatga è capitada en la citad Nakhon Ratchasima, en il nordost da la Tailanda. La citad vegn era numnada Korat. Medias indigenas rapportan ch'i haja dà 27 morts ed enturn 60 blessads.
L'attentader era schuldà. El haja cumenzà ses amoc sin ina basa militara. Là haja el engulà armas e muniziun e mazzà ses cumandant e dus auters schuldads. Lura saja el charrà cun in vehichel engulà tar in tempel budistic ed ha mazzà cartents. Pli tard haja el fatg ina mazzacrada en il center da cumpra. Là saja el sa zuppà e la fin finala vegnì sajettà giu da las forzas da segirtad. El ha emess ses amoc live en l'internet.
Forzas da segirtad hajan spendrà tschients persunas en il center da cumpra durant che l'um saja ì amoc. Il motiv per l'amoc è tenor il primminister ina dispita persunala tranter el e la sira da ses cumandant.
RTR novitads 15:00+