Emissiuns da CO2 creschan danovamain

Sin l'entir mund creschan las emissiuns da CO2 quest onn probablamain per 2% – quai suenter trais onns da stagnaziun.

Chamins d'industria cun svapurs. Bild in Lightbox öffnen.

Legenda da maletgs: Adina dapli emissiuns da CO2. Keystone

A Bonn discuteschan actualmain represchentants da 195 pajais co realisar la cunvegna dal clima da Paris. Ch'i basegna decisiuns consequentas mussan studis actuals. Suenter 3 onns da stagnaziun sin aut nivel creschan las emissiuns da CO2, quest onn probablamain puspè. Tenor experts èn fin la fin da l'onn 41 milliardas tonnas dioxid carbonic arrivadas en l'atmosfera. Quai è in augment da 2%. 37 milliardas tonnas derivan da combustibels fossils sco ieli e charvun.

Surtut en China creschan las emissiuns

Surtut la China saja responsabla per l'augment da da las emissiuns. Perquai ch'i vegn duvrà en il pajais dapli charvun sco element combustibel, vegnan las emissiun a crescher per 3,5% cumpareglià cun l'onn avant – en tut èn quai lura 10,5 milliardas tonnas.

Percunter è l'augment da 2% en l'India pli bass che l'onn passà. Quai resulta probablamain ord il fatg che l'economia en il pajais è per il mument plitost debla. Sche l'economia avess da sa revegnir en l'India, lura èsi però da far quint che las emissiun creschan puspè.

Diminuziun en l'Europa ed ils Stadis Unids

En l'Europa ed ils Stadis Unids èn las emissiun levamain sa diminuidas. La diminuziun da 0,2 fin 0,4% na tenscha dentant betg per egualisar l'augment en autras regiuns dal mund.

Corinne Le Quéré dal Tyndall Centre for Climate Change Research a Norwich en Gronda Britannia ha discurrì a Bonn da resultats fitg dischillusiunants. I na saja quasi betg pli pussaivel da cuntanscher in augment da temperatura da sut 2 grads celsius, nundir in da 1,5 grads.

RR novitads 14:00