Siglir tar il cuntegn

Header

Sean Connery.
Legenda: Keystone
cuntegn

Emprim actur da James Bond Sean Connery è mort

Sean Connery l'anteriur star da James Bond è mort en la vegliadetgna da 90 onns. Quai rapporta l'emettur britannic BBC cun sa referir sin la famiglia da l'actur da la Scozia. L'actur ch'è naschì il 1930 a Edinburgh è stà l'emprim che ha giugà la rolla da James Bond – e per blers fans er il meglier.

Sean Connery ha tranter il 1962 ed il 1983 giugà set giadas la rolla da l'agent secret britannic. El ha dentant adina mess gronda paisa sin quai da betg vegnir reducì sin quella rolla ed è successivamain sa svilupà tar in actur da caracters.

In oscar ed elevà en il stan d'aristocrazia

Savens è el stà il scolast pli vegl u il mentur sabi. Per exempel da la vart da Harrison Ford sco bab dad Indiana Jones. Al public europeic è el surtut er restà en memoria sco William von Baskerville en il film «Der Name der Rose», la versiun cinematografica dal roman dad Umberto Eco.

Ses unic Oscar ha Sean Connery survegnì il 1988 per ina rolla laterala sco policist cun experientscha en il film da gangsters «Die Unbestechlichen» – quella giada dasper Kevin Costner. L'onn 2000 è l'actur da la Scozia vegnì elevà da la regina Elizabeth II en il stan d'aristocrazia ed ha dapi lura pudì sa numnar Sir Sean. Il 2004 ha Sean Connery terminà sia carriera da film.

Restà collià cun la patria

Dapi il 1975 è Connery stà maridà cun la pictura franzosa Micheline Roquebrune. Ord l'emprima letg cun l'actura australiana Diane Cilento ha el in figl. Schebain che Sean Connery ha la gronda part dal temp vivì en Spagna u sin las Bahamas, è el adina stà collià cun sia patria ed è s'engaschà fermamain per l'independenza da la Scozia.

Ord l'archiv da SRF:

video
Sean Connery wird 90 Jahre alt
Or da Glanz & Gloria dals 24.08.2020.
laschar ir

RTR novitads 14:00

Artitgels legids il pli savens

Scrollar a sanestra Scrollar a dretga