Siglir tar il cuntegn

Header

In uschenumna «kit» per l'assistenza al suicidi en Belgia.
Legenda: In uschenumna «kit» per l'assistenza al suicidi en Belgia. Keystone
cuntegn

Exteriur Emprim cas d’assistenza a la mort tar minoren

L'assistenza a la mort activa per persunas creschidas che stattan sin murir è gia dispitaivla. En Belgia datti ussa l'emprim cas d'in uffant ch'è mort cun assistenza dals medis.

Il parsura da la cumissiun per l’assistenza al suicidi da la Belgia Wim Distelmans ha confermà il cas. Il (La) pazient minoren(a) era tenor las indicaziuns malsauns d’ina malsogna nuncurabla. Detagls concrets n’ha el betg numnà.

Dapi il 2014 è l’assistenza al suicidi lubida tar minorens

La Belgia ha in da las pli liberalas leschas quai che concerna l’assistenza al suicidi. Uschia pon dapi il 2002 persunas creschidas che pateschan d’ina malsogna nuncurabla murir voluntari. Dapi dus onns lubescha la Belgia da prestar assistenza a la mort activa er tar uffants en tut las vegliadetgnas. Premissa è ina giada ch’ils geniturs dattan lur consentiment.

Sulet fitg paucs uffants

«Per fortuna na dat quai betg uschè blers uffants nua che adempleschan las pretensiuns. Ma quai na munta betg che nas dastgain prender ad els il dretg d’ina mort digna», ha ditg Distelmans ad ina gasetta da la Belgia. Sco in emettur beltg ha rapportà na sa tractia quai betg d’in uffant ma d’in teenager.

Assistenza al suicidi scumandà en ils blers pajais

L’assistenza al suicidi è scumandada en ils blers pajais dal mund. En l’Uniun europeica è l’assistenza al suicidi sulet lubida en l’Ollanda, il Luxemburg e la Belgia. Er la Svizra ha scumandà l’assistenza al suicidi. Ma en Svizra èsi permiss dad offrir tissi ad in pazient cun ina malsogna nuncurabla. L’assistenza passiva al suicidi è dentant en blers pajais lubida ni almain tolerada. Gliez munta che las mesiras per prolungar la vita vegnan sistidas.

RR novitads 15:00

sda/ma

Artitgels legì il pli savens

Nach links scrollen Nach rechts scrollen