Siglir tar il cuntegn

Header

cuntegn

Exteriur Emprims fugitivs per la Germania - auters turnan en Tirchia

La Grezia ha cumenzà da transportar fugitivs enavos en la Tirchia. Bus han transportà glindesdi en damaun tozzels da fugitivs en il port da l'insla greca Lesbos, sco la televisiun greca ha mussà. Da l'autra vart ha la Tirchia tramess ils emprims fugitivs sirians en direcziun da la Germania.

Suenter han ils emprims dus bastiments cun fugitivs a bord bandunà il port da Lesbos en direcziun Tirchia. Tenor il pledader dal stab da crisas sa chattavan var 202 fugitivs a bord, tuts umens. Auter che dus Sirians che turnian voluntarmain, sa tractia da migrants dal Pakistan e da pajais da l’Africa dal nord. Entant è l'emprim bastiment arrivà en il port tirc Dikili. L'UE ha fatg ina cunvegna cun la Tirchia, che la Grezia po trametter enavos tut ils fugitivs arrivads suenter ils 20 da mars, e che na dumondan betg asil en Grezia.

Emprima gruppa da fugitivs sirians arrivada da la Tirchia en Germania

In'emprima gruppa da 16 persunas da la Siria è arrivada oz da Istanbul a Hannover en Germania. Enturn mezdi duai alura ina segunda gruppa da 16 fugitivs arrivar, han las autoritads tudestgas conferma. Ils fugitivs vegnan en Germania en connex cun la cunvegna che l'UE ha fatg cun la Tirchia. Uschia duai l'UE surpigliar fugitivs sirians renconuschids, sco cuntramesira per persunas sirianas che la Grezia dastga usstrametter enavos en la Tirchia.

RR Novitads 07:00+

Artitgels legids il pli savens