Siglir tar il cuntegn

Header

cuntegn

Exteriur En acziun cunter cuntrabanda dad umans

Sin giavisch da la Germania, la Tirchia e la Grezia s’engascha NATO cunter la cuntrabanda dad umans en la mar Egeica. Quai ha annunzià il minister da defensiun american, Ashton Carter, suenter in inscunter dals ministers da la NATO a Brüssel.

I sa haja furmada ina mafia, che explotescha «questa povra glieud», ha ditg Ashton Carter vinavant.

La NATO en tschertga da bartgas cun fugitivs

Tenor indicaziuns da la Germania duain las truppas da la NATO survegliar in'acziun cunter ils cuntrabandists dad umans en la mar tranter la Tirchia e la Grezia. Ina furmaziun da 5 bartgas da cruschader sut commando da la bartga tudestga «Bonn» vegn a sa metter en viadi per chattar bartgas da fugitivs.

Suenter duajan las guardias costalas dals singuls pajais pudair stoppar las bartgas cun ils fugitivs. Tenor la ministra da defaisa tudestga, Ursula von der Leyen, haja la Tirchia sincerà, da prender si las persunas, che la NATO salva da privel da mar.

En Germania vegn crtitgada l'acziun

Cura che l’acziun duai cumenzar n’è anc betg vegnì communitgà, mo ch’ella duai cumenzar «prest» è vegnì detg. En la mira da l’acziun duajan esser las bandas da cuntrabandists dad umans.

En Germania crititgà l’opposiziun ils plans. Uschia ha detg la scheffa da fracziun dals sanesters, Sahra Wagenknecht, che l’acziun sa drizzia main cunter ils cuntrabandists, ma cunter las bartgas da fugitivs.

RR novitads 12:00

Artitgels legids il pli savens