En l’ost d’Aleppo enserrads radund 50’000 persunas

En l'ost da la citad siriana Aleppo èn anc enserradas radund 50'000 persunas, quai tenor indicaziuns da las Naziuns Unidas. Tranter questas sajan 40'000 civilists ha ditg l'incumbensà spezial da l'ONU Staffan de Mistura a Paris.

In dals convois ch'evacuescha la populaziun ord da Aleppo. Bild in Lightbox öffnen.

Legenda da maletgs: In dals convois ch'evacuescha la populaziun ord da Aleppo. Keystone

Evacuaziun interruta

Il mument è l’evacuaziun da persunas ord la citad siriana Aleppo para interrutta. Quai rapportan pliras agenturas da novitads. I haja dà explosiuns datiers il lieu nua ch’ils bus d'evacuaziun partian. La televisiun statala fa responsabla ils rebels per las attatgas. Els hajan cuntrafà a las cunvegnas d’evacuaziun. Autras medias rapportan che las rutas d’evacuaziun sajan bloccadas.

Tenor indicaziuns da la Tirchia ha in segund convoi cun persunas evacuadas bandunà la part dal ost da la citad d’Aleppo. Radund 1’200 persunas sajan uschia vegnidas en segirtad, rapportan circuls da la regenza tirca.

Evacuaziun pudess cuzzar plirs dis

Questa acziun d’evacuaziun pudess tenor indicaziuns dals gidanters anc cuzzar plirs dis. Fin ier saira eran sulet 3’000 civilists e pliras persunas blessadas vegni transportads ord la citad, ha ditg la manadra da la missiun dal comité internaziunal da la Crusch Cotschna Marianne Gasser.

A la citad da Idlib smanatscha il medem destin sco Aleppo

Plirs dals cumbattants èn uss sa retratgs cun lur famiglias en la provinza da Idlib cun la citad principala dal medem num. Sco de Mistura ha accentuà smanatschia a la citad da Idlib in sumegliant destin sco ad Aleppo.

Era la Trichia pretenda che la regenza siriana collavureschia. Il reschim sirian impedeschia la realisaziun da las pausas da cumbat ed impedeschia era la evacuaziun, ha ditg il president tirc Recep Erdogan ad Ankara.

RR novitads 06:00