Sco Johnson ha scrit via Twitter hajan ins uss ina grondiusa cunvegna, che dettia enavos a la Gronda Britannia la controlla. L'inscunter dals schefs da stadi da l'Uniun Europeica sco er il parlament britannic ston uss anc approvar la cunvegna.
Opposiziun en la Gronda Britannia
Il manader d'opposiziun en la Gronda Britannia, Jeremy Corbyn, ha gia annunzià che sia partida na possia betg approvar la cunvegna actuala. Tenor el saja la cunvegna actuala anc mendra che quella che Theresa May aveva elavurà il 2018.
Er la partida nordirlandaisa DUP ha ditg ch'ins na vegnia betg a sustegnair la cunvegna. Fin uss aveva la DUP per il pli sustegnì la partida da Boris Johnson, ils Tories, en il parlament. Quels èn dependents dal sustegn – els na tegnian numnadamain nagina maioritad en la chombra da deputads. Er il schef da la partida da Brexit, Nigel Farage, na tegn nagut da la cunvegna da sortida.
Quai n'è simplamain nagin Brexit
El propona ord quest motiv al parlament da dir na a la cunvegna. La partida da Brexit na fa betg part dal parlament en la Gronda Britannia. La concurrenza da la partida dretga pudess dentant custar vuschs a Johnson tar las proximas elecziuns.
«Ina cunvegna gista»
Tenor il president da la cumissiun da l'Uniun Europeica Jean-Claude Juncker è la cunvegna percunter gista per omaduas varts. Ils 27 stadis commembers da l'UE han gia approvà questa gievgia la cunvegna actuala.
Dapi plirs dis èn Londra e Brüssel vid contrahar las midadas davart la cunvegna da sortida, che l'anteriura primministra Theresa May aveva elavurà il 2018 ensemen cun l'Uniun Europeica. Johnson aveva pretendì differentas midadas perquai ch'el temeva che la colliaziun tranter l'UE e la Gronda Britannia vegnia memia stretga. Punct da dispita è cunzunt stà il cunfin tranter l'Irlanda e l'Irlanda dal Nord.
Plinavant han tant Juncker sco er Johnson anc ina giada rinforzà, ch'ì na vegnia betg a dar in'ulteriur spustament dal Brexit. La Gronda Britannia sorta pia ils 31. d'october or da l'Uniun Europeica – cun ni senza ina cunvegna.
RR novitads 12:00