Siglir tar il cuntegn

Header

cuntegn

Encurunaziun Charles III Il Reginavel Unì ha ses retg Charles III e sia regina Camilla

Il settember passà è Charles III vegnì proclamà sco retg da la monarchia britannica. Ussa èn el e sia consorta vegnids encurunads.

Suenter l'encurunaziun ha retg Charles III prendì plaz sin il tron cun las insignias e la curuna. Cun quest act simbolic en la Westminster Abbey a Londra è el ussa intronisà sco retg dal Reginavel Unì. Quai accumpagnà da pleds da l'archuvestg da Canterbury. Suenter è era sia consorta Camilla vegnida encurunada,ha era retschavì l'ieli sontg ed in anè che simbolisescha sia letg cun il reginavel. L'encurunaziun da Camilla è para stà in giavisch explicit da Queen Elizabeth II. Fin ussa è ella stada «Queen consort» – ed a partir dad ussa dastga ella sa numnar «Queen».

Suenter duas uras d'encurunaziun ed intronisaziun fineschan las ceremonias cun l'imni naziunal britannic «God Save the King». Lura sa metta il pèr roial sin via envaos en il Buckingham Palace.

Monarchists ed opponents èn stads preschents

Per l'encurunaziun èn tschientmillis persunas sin las vias da Londra. Sco che SRF rapporta eran las bunas plazzas vi da la via da la processiun gia occupadas la bun'ura. Avant la ceremonia hai er dà protests d'opponents da la monarchia. Activistas ed activists discurran da 6 persunas arrestadas, rapporta l'agentura da novitads britannica PA. Era il schef da l'organisaziun «Republic» saja vegnì arrestà.

audio
Encurunaziun da Charles e Camilla: Observaziuns da la ceremonia
ord Sport ed actualitad dals 06.05.2023. Maletg: SRF
laschar ir. Durada: 6 minutas 38 Secundas.

Giasts roials, politics e da cultura

A la ceremonia divina èn vegnids giasts prominents da l'entir mund a Londra. Sco represchentants dad autras monarchias europeicas èn vegnids Willem-Alexander e Máxima dals Pajais Bass, Felipe e Letizia da la Spagna sco era Carl Gustaf e Victoria da la Svezia. Per la chasa roiala dal Danmarc èn vegnids il prinzi ereditar Frederik e la princessa ereditara Mary, lura era Haakon e Mette-Marit da la Norvegia. Il pli giuven fegl da retg Charles III – prinzi William – ha assistì persul a la ceremonia. Sia dunna Meghan saja restada a chasa en ils Stadis Unids cun ils uffants.

Sper ils giasts roials èn era stads prschents giasts politics sco il president franzos Emmanuel Macron, la presidenta da la cumissiun da l'UE Ursula von der Leyen, il primminister canadais Justin Trudeau, ils anteriurs primministers britannics Boris Johnson e Tony Blair, la first lady dals Stadis Unids da l'America Jill Biden e la dunna dal president ucranais Olena Selenska. Però era stars populars sco Katy Perry u era Lionel Richie han pudì assistir a la ceremonia. Il president da la Confederaziun Alain Berset ha represchentà la Svizra tar l'act festiv en la Westminster Abbey.

Il program da l'encurunaziun (3 dis)

Avrir la box Serrar la box

Sonda:

  • 11:20 Gir cun la charrotscha dal palast envers Westminster Abbey
  • 12:00 Charles e Camilla arrivan tar il Westminster Abbey per il servetsch divin che cuzza duas uras
  • 13:00 Il retg retschaiva il sontg ieli dal archuvestg da Canterbury e vegn encurunà
  • 14:00 Processiun enavos tar il Buckingham Palace
  • 15:15 Retg Charles e regina Camilla sa preschentan sin il balcun

Dumengia:

  • Per la dumengia vegn la populaziun animada da far marenda d'encurunaziun e festas sin las vias cun lur vischins e vischinas. Sco tratga è Charles sa decidì per ina quiche – ina petta salada da favas, spinat e estragon.
  • La saira ha lieu il concert d'encurunaziun sin l'areal dal chasti da Windsor. Tranter auter cun Take That, Lionel Richie, Andrea Bocelli e Katy Perry.

Glindesdi:

  • Ils 8 da matg è vegnì declerà sco firà. La populaziun vegn animada da s'engaschar e far lavur voluntaria sut il motto: «The Big Help Out».

Pli modern e pli pitschen:

Charles para da vulair ir cun il temp, perquai duai tut esser inpà pli pitschen e pli mudest che tar sia mumma Queen Elisabeth. L'entira encurunaziun duai cuzzar pli curt, pia be duas uras empè da trais sco tar sia mamma. Ultra da quAi ha Charles per l'emprima giada envidà represchentats dad autras religiuns che fan part a la ceremonia. Era sch'i va per il dresscode duai tut esser pli simpel, perquai vegn giavischà dals hosps pli mudesta vestgadira e betg oppulents e pompus vestgius. Charles sez haja en il senn da vegnir en sia uniforma da militer e na betg en chautschas chatschiel e trachta.

audio
Encurunaziun da King Charles: expert Adrian Camartin declera
ord Actualitad dals 06.05.2023. Maletg: RTR
laschar ir. Durada: 12 minutas 8 Secundas.

Ils giasts:

Tar l'encurunaziun da Queen Elisabeth il 1953 eran circa 8'500 persunas envidadas. Quai èn varga 4 giadas dapli che tar Charels. I vegn quintà cun bun 100'000 aspectaturas ed aspectaturs. Tranter ils hosps envidada è era il president da la Confederaziun Alain Berset, Emanuel Macron, Olaf Scholz ed Ursula von der Leyen. Dentant betg be politichers e politicras e roials èn da la partida. Era in u l'auter prominent sco: Tom Cruise, Victoria e David Beckham, Rowan Atkinson, Bear Grylls e Stella McCartney èn da la partida. Per grondas discussiun ha la dumonda sche Harry e Meghan vegnan ad esser da la partida procurà, cunquai ch'els han bandunà la famiglia roiala. Harry vegn ad esser preschents.

audio
Encurunaziun da King Charles: fatgs e cifras
ord Actualitad dals 06.05.2023. Maletg: Keystone
laschar ir. Durada: 4 minutas 6 Secundas.

Ils custs:

La ceremonia procura per grands custs ì vegn quintà cun custs da 50 fin 100 milliuns pfunds. L'encurunaziun da Queen Elisabeth ha custà da lezzas uras 20.5 milliuns pfunds. Quant ch'ì è effectiv n'è anc betg cler. Malgrà ch'i para sco sche Charles vuless ina pli mudesta encurunaziun èn ils custs auts. Blers raps vegnan tenor rapports cunzunt investì en la segirtad.

A Londra gira

Anna Lee Famos abitescha dapi varga 60 onns a Londra. Pia, dapi ch'ella abitescha en l'Engalterra ha ella be enconuschì Queen Elisabeth II sco monarca. Uss è ella gia marvigliusa co quai vegn ad esser cun Charles III sco retg. Ella sa legra fitg d'observar la festa en la televisiun e da festivar ensemen cun amis ed amias a diversas festas da via.

audio
Anna Lee Famos sa legra gia da guardar e festivar
ord Actualitad dals 06.05.2023. Maletg: RTR
laschar ir. Durada: 3 minutas 26 Secundas.

RTR actualitad 07:00

Artitgels legids il pli savens