En l'Engalterra han medis assistents cumenzà la pli lunga chauma fin ussa en l'istorgia dal servetsch da sanadad NHS. La chauma duai cuzzar sis dis. Ils medis vulan uschia far valair in meglier pajament. «Igl è la pli lunga chauma cun la quala nus essan vegnids confruntads insacura», ha ditg il schef da l'associaziun da las organisaziuns purtadras dal NHS, Julian Hartley, mesemna a la BBC. Ina gronda part da las operaziuns stoppia vegnir spustada. Ultra da quai saja suenter Nadal e Silvester adina spezialmain bler en gir. La recusaziun duess cuzzar da mesemna enfin mardi proxim en damaun.
La NHS, ch'è cronicamain sutfinanziada e sutoccupada, vegn dapi mais adina puspè scurlattada dad undas da chauma. La regenza aveva concedì l'onn passà in augment da paja dad en media 8,8%, uschia ha communitgà l'agentura da novitad PA. Ils medis han renvià quai sco betg suffizient. «Junior doctors» fan ora ina part considerabla dal persunal medicinal en l'Engalterra. Manegiads èn medis en scolaziun – els pon gist avair terminà lur studi u lavurar gia onns per il NHS.
