Siglir tar il cuntegn
Inhalt

Exteriur Ensemen enavant: La Corea duai vegnir libra dad armas atomaras

Tar lur inscunter suprem a Pjöngjang èn sa cunvegnids il president da la Corea dal Sid Moon Jae ed il schef da stadi da la Corea dal Nord Kim Jong Un da deliberar la peninsla coreana dad armas atomaras. La mesemna han els suttascrit la cunvegna correspundenta, scriva l’agentura da novitads SDA.

La televisiun da la Corea dal Sid rapporta da l'inscunter suprem.
Legenda: La televisiun da la Corea dal Sid rapporta da l'inscunter suprem. Keystone

Tenor Sid Moon Jae, il president da la Corea dal Sid, saja la Corea dal Nord sa declerada pronta da deconstruir cun l’indriz Yongbyon ses indriz atomar pli grond e da laschar entrar inspecturs d’atom internaziunals en il pajais.

Cunvegna cumpiglia er zonas da puffer e da scumond

Per reducir las tensiuns militaras tranter lur dus pajais vulan la Corea dal Sid e quella dal Nord drizzar en tranter ils dus pajais zonas da puffer e da scumond da sgular. Ina da questas zonas da puffer saja en la Mar Melna. Là duajan vegnir sistids exercizis militars ed emprovas da sajettar.

Kim Jong Un haja annunzià da vulair viagiar «proximamain» en la chapitala sid-coreana Seoul.

Ensemen «pli svelts, pli auts, pli ferms»

Las duas Coreas vulan dentant er collavurar sin champ sportiv: Suenter lur inscunter a Pjöngjang han ils dus schefs da stadi anc annunzià da vulair candidar communablamain per ils gieus olimpics 2032.

RR novitads 06:00