L'organisaziun White Helmet ha dacurt survegnì in premi nobel alternativ per lur engaschi umanitar en Siria.
Ils White Helmets, las chapellinas alvas, quai èn numerus voluntaris che han la finamira da proteger la populaziun da la Siria. Lur manader Raed Saleh ha per insaquants dis mess da la vart la chapellina per ir al WEF a Tavau.
Dentant, sco el di, betg per forsa survegnir daners dals ritgs e pussants, ma per mussar ad els co che la populaziun en Siria pateschi. Aleppo saja sblundregià. Dieschmillis da fugitivs sajan ordaifer dad Aleppo sin il pajais – senza protecziun, senza in tetg sur il chau e pateschan fraid. Durant ch'el saja qua a Tavau, sajan ses collegas vidlonder da salvar vitas.
