Siglir tar il cuntegn

Exteriur Erdogan appellescha da demonstrar via sms

Il president tirc Recep Tayyip Erdogan ha appellà a la populaziun da far in’ulteriura demonstraziun. Quai ha Erdogan fatg cun trametter in sms. Tenor indicaziuns da medias localas è il messadi vegnì tramess sin tut ils telefonins en la Tirchia.

Ils Tircs duain ir sin via a demonstrar per far frunt als terrorists.
Legenda: Ils Tircs duain ir sin via a demonstrar per far frunt als «terrorists». Reuters

Erdogan pretendia da far frunt als «terrorists» sin via. Gia durant il putsch betg gartegià aveva Erdogan appellà a la populaziun da sa defender cunter ils putschists.

Mesemna saira ha Erdogan proclamà il stadi d’urgenza. Uschia pon dretgs fundamentals sco per exempel la libertad da pressa e la libertad da reuniun vegnir sistidas u almain restrenschidas.

Ambassadur tirc vegn cità en il ministeri

Pervia da demonstraziuns betg annunziadas a Vienna per il president Recep Tayyip Erdogan, ha entant la regenza austriaca cità l’ambassadur tirc en il ministeri da l’exteriur. I dettia indizis che questas demonstraziuns sajan vegnidas planisadas da la Tirchia, ha ditg il minister da l'exteriur austriac Sebastian Kurz al radio statal. Quai na saja betg acceptabel e l’Austria veglia protestar encunter. Ultra da quai veglia el savair da l’ambassadur tirc, en tge direcziun che la Tirchia sa sviluppeschia.

RR novitads 14:00