Siglir tar il cuntegn
cuntegn

Exteriur Erdogan lascha reviver ses plans ch'avevan provocà protestas

Trais onns suenter las grevas protestas metta il president tirc puspè sin maisa ils plans per construir ina caserna osmanica cun abitaziuns e fatschentas en il parc da Gezi.

Dus lavurers en il parc Gezi ad Istanbul - qua vul Erdogan realisar in project pli grond
Legenda: En il parc Gezi ad Istanbul vul Erdogan realisar in project pli grond Keystone

Avant trais onns aveva quai dà grevas protestas cunter quest project. Almain set persunas eran mortas durant las protestas. Pliras tschient persunas avevan protestà ed empruvà d'evitar ch'i vegnia pinà plantas en il parc. Il parc da Gezi è amez la metropola Istanbul. La finala aveva ina dretgira franà il project ad interim.

Ussa tuttina

Il president tirc Recep Tayyip Erdogan ha ussa confermà sia finamira en in'emissiun da televisiun. «Nus stuain esser curaschus en quest connex» ha Erdogan sincerà. El veglia laschar reconstruir ina caserna dal temp dal Imperi osmanic ed eriger ina moschea en il parc. L'onn 2013, cura ch'il president aveva preschentà per l'emprima giada quests plans aveva el tranter auter er discurrì d'in center da cumpra. Quel n'ha el dentant betg menziunà en ses pled da televisiun da la sonda.

RR novitads 6:00