Siglir tar il cuntegn
Inhalt

Exteriur Erdogan smanatscha d’avrir ils cunfins per fugitivs

Suenter ch'il parlament da l'UE ha proponì da metter sin glatsch las contractivas cun la Tirchia davart in'adesiun a l'Uniun Europeica, ha il president tirc reagì.

Recep Tayyip Erdogan.
Legenda: Dapi l'emprova da putsch dal fanadur ha Erdogan gia relaschà e laschà arrestar milis da persunas. Keystone

Recep Tayyip Erdogan smanatscha da vulair avrir ils cunfins per ils fugitivs. Sche l'UE gaja anc pli lunsch laschia el viagiar ils fugitivs en l'Europa, ha ditg Erdogan en in pled ad Istanbul.

Ina cunvegna tranter l'UE e la Tirchia ha francà che l'UE po trametter enavos tut ils fugitivs che vegnan illegalmain sur la Tirchia e las inslas grecas en l'Europa. Sco cuntramesira sto ha l’Uniun europeica tranter auter empermess d’abolir l’obligatori da visum per ils burgais tircs. La premissa è però che la Tirchia adempleschia 72 pretensiuns.

UE reagescha sin las repressiuns

La gievgia aveva il parlament d’Europa cusseglià da metter sin glatsch ils discurs d’adesiun. La raschun per quest pass èn las repressiuns cun las qualas la regenza tirca ha reagì suenter l’emprova da putsch dal fanadur.

Passa 125’000 emploiads dal stadi èn gia vegnids relaschads, pliras millis persunas èn vegnidas arrestadas. Tranter ils relaschads tutgan schuldads, policists e derschaders. Er schurnalists ed academichers èn però vegnids en il visier da las autoritads.

RR novitads 12:00