Siglir tar il cuntegn
cuntegn

Exteriur Erdogan tira consequenzas - passa 2'700 derschaders relaschads

Suenter l'emprova da putsch en Tirchia èn para vegnids relaschads passa 2'700 derschaders, quai rapporta l'agentura da novitads statala Anadolu. Plinavant sajan 5 commembers dal cussegl aut dals derschaders ed advocats ad Ankara vegnids suspendids. Cunter els saja vegni instradà proceduras.

Ina part da la punt dal bosporus en silhouetta. Sin la punt in char armà che squitta aua lunsch sur ina fulla da persunas. Davostiers la silhouetta dad Istanbul.
Legenda: In char armà cun chanun d'aua da la polizia emprova da stgatschar protestaders sin la punt dal Bosporus ad Istanbul. Ils protestaders èn cunter la regenza. Reuters

Tge ch'è enconuschent:

  • Il putsch è stinschentà
  • La regenza ha relaschà passa 2'700 derschaders e suspendì 5 commembers dal cussegl aut dals derschaders ed advocats.
  • Passa 6'000 persunas / putschists supponids èn vegnids arrestadas
  • En la notg sin sonda èn almain 265 persunas mortas
    (da quellas: 47 persunas civilas, 104 putschists)
  • 1'440 persunas blessadas
  • I ha dà explosiuns tant ad Ankara sco ad Istanbul
  • las regiuns da turissem betg pertutgadas
  • Il president tirc fa responsabel ses inimì Fatullah Gülen

Il militar tirc rapporta d'almain 265 morts e dapli che 1'440 blessads ad Istanbul ed Ankara. Dals morts èn 47 persunas civilas.

Sajettadas sin la punt dal Bosporus

Divers meds da massa avevan rapportà ch'il parlament ad Ankara saja vegnì bumbardà. L'emettur da televisiun tirc NTV aveva rapportà da bumbardadas en vischinanza dal palast dal president. Igl era da vesair fim nair ord la direcziun dal palast. Ad Istanbul haja schuldada sajettà sin ina fulla da glieud sin la punt dal bosporus.

Parts dal militar avevan annuzià la saira tard sin sonda ch'els hajan surpiglià la pussonza en Tirchia. Plinavant avevan els proclamà il dretg da guerra ed in scumond da sortida. Tant sur Istanbul sco era sur Ankara sgulavan helicopters ed eroplans da cumbat.

Perditga Franz Caduff

Franz Caduff, oriund da Zernez, che viva dapi 26 onns ad Istanbul è stà perditga dals eveniments da la notg. Uss saja la situaziun sa normalisada, di era el.

Franz caduff en in polo shirt sper la riva da la mar
Legenda: Franz Caduff MAD
Uss hai damain glieud sin via, uschiglio èsi ruassaivel
Autur: Franz CaduffAbita dapi 26 onns ad Istanbul

Franz Caduff viva el center dad Istanbul, exat tranter las duas punts dal Bosporus ch'èn vegnidas serradas. Bler n'haja el betg durmì la notg. L'emprova da putsch saja stà ina surpraisa, di Franz Caduff. La tema d'ina attatga terroristica saja bler pli preschenta en il patratgar.

Il president tirch en ina fulla da glieud che guarda en ina direcziun. blers cun telefonin enta pugn.
Legenda: Erdogan saun e salvs Reuters

Putsch stinschentà

La situaziun para entant sut controlla: da quai da 2'800 putschists supponids sajan vegnids arrestads. Ad Istanbul haja schuldada, che fagevan part al putsch, capitulà. Maletgs televisivs mussan sco la polizia tirca arrestescha schuldada sin la punt dal Bosporus.

La regenza tirca di ch'il putsch saja vegnì impedì. La situaziun saja per gronda part sut controlla. Concret fa il president tirc Recep Tayyip Erdogan repsonsabel per il putsch il predicatur Fethullah Gülen. Gülen e ses aderents vegnian a stuair star bun per quest'acziun.

Il predicatur Gülen viva en l'exil en ils Stadis Unids da l'America. El è in dals pli gronds inimis da Erdogan. Il moviment da Fethullah Gülen condemnescha entant l'emprova da derscher la regenza en Tirchia.

Sgols mo en destinaziuns da vacanzas

En las destinaziuns da vacanzas tircas - en il sid dal pajais - saja la situaziun ruassaivla, uschia organisaturs da viadis. Turists vegnan entant supplitgads da restar en lur hotels ad interim.

La societad aviatica svizra Swiss sgola vinavant tenor plan en il sid da la Tirchia. Tgi che veglia entant stornar ses sgol en Tirchia u cudischar enturn, possia far quai gratuit, uschia agenturas da novitads. Ils sgols ad Istanbul ha la Swiss entant stritgà per oz.

Reacziuns da la politica internaziunala

Politichers da tut il mund reageschan sin l'emprova da derscher la regenza tirca. Il president american Barack Obama ha appellà a la populaziun tirca da sustegnair la regenza elegida a moda democratica. I saja d'evitar violenza.

Reacziuns sumegliantas dat quai da l'Uniun europeica. L'UE pretenda che la Tirchia turnia a l'urden confurm a la constituziun. La Tirchia saja in partenari impurtant da l'UE. La regenza tudestga ha affirmà ses sustegn a la regenza tirca.

Il secretari general da la NATO, Jens Stoltenberg, ha appellà da respectar las instituziuns democraticas e la constituziun tirca.

Novitads 06:00

Putschs en Tirchia

Putschs en Tirchia

1960: Militari cunter Adnan Menderes (dapli)

1971: Militari cunter Cevdet Sunay (dapli)

1980: Militari, General Kenan Evren surpiglia pussanza (dapli)

Plinavant ha quai dà diversas emprovas na grategiadas.