Siglir tar il cuntegn

Header

cuntegn

Exteriur Erdogan vs. Böhmermann va en la proxima runda

Il president tirc Recep Tayyip Erdogan na ceda betg - el vul uss laschar scumandar l'entira poesia disfamanta dal satiricher tudestg Jan Böhmermann.

Michael-Hubertus von Sprenger , l'advocat dad Erdogan haja purtà plant a Hamburg rapporta la revista tudestga Spiegel. Von Sprenger ha tschernì uss in proceder giuridic («Hauptsacheverfahren») che permetta dad ir la via giuridica enfin il tribunal federal da cassaziun u la dretgira constituziunala.

Böhmerann vs. Erdogan 1

Mez matg aveva la dretgira a Hamburg gia decretà ina disposiziun provisorica che scumonda da derasar vinavant ina gronda part da la poesia. Tenor la dretgira han las parts scumandadas da la poesia satirica in cuntegn ingiuriant che violescha l'onur dal president tirc.

Böhmerann vs. Erdogan 2

Sper la procedura a Hamburg è Böhmermann era confruntà cun ina procedura d’inquisiziun pervi dal suspect dad avair insultà il schef dad in stadi exteriur. Per questa procedura aveva la regenza tudestga dat liber la via sin dumonda da la regenza tirca.

Co che tut ha cumenzà

Il satiricher Jan Böhmermann aveva prelegì ils 13 da mars en sia emissiun «Neo Magazin Royale» ina poesia ingiurianta sin il president tirc. La raschun da far quai ha Böhmermann communitgà a medem mument – numnadamain ch’el veglia mussar cler e bain tge ch’ina poesia ingiurianta saja per propi. Da questa demonstraziun s’era sviluppada in affera da dimensiun europeica.

RR novitads 11:00

Artitgels legids il pli savens