L’UNICEF avertescha da las consequenzas da la guerra en l’Ucraina. L’organisaziun d'agid per uffants da las Naziuns Unidas ha rimnà datas ord 22 pajais da l'Europa da l'Ost e l'Asia centrala. Ils uffants portian la pli gronda chargia entras la guerra en l'Ucraina. Oravant tut ils uffants da l'Ucraina e da la Russia èn pertutgads.
Pli paupra ch'ina famiglia è, e pli bler da las expensas dal mintgadi èn sulettamain per magliar, stgaudar e mobilitad. Auts pretschs d'energia e victualias tutgan uschia il pli fitg famiglias paupras. La paupradad d'uffants possia laschar murir 4'500 uffants avant ch'els vegnian in onn vegls. Be quest onn saja da quintar che fin 117'000 scolaras e scolars rumpian giu la scolaziun pervi da la paupradad. In da trais uffants vegnia plinavant a restar pauper l'entira veta.
