La pli gronda gruppa da passagiers europeics deriva da la Germania cun 1,8 milliuns giasts, quai èn 27,5% da tut ils passagiers. Lura suondan la Gronda Britannia e l'Irlanda cun ina cumpart al martgà da mintgamai 27,2%.
Passa 360'000 plazzas da lavur
La valur da las cruscheras per l'Europa munta tenor l'analisa da l'associaziun a bun 41 milliardas euros. Cumpiglià en quai n'èn betg mo las expensas directas da las societads da navigaziun, dals passagiers e da las equipas, mabain er las taglias ed effects indirects. Cunquai dat la branscha lavur a passa 360'000 persunas en l'Europa.
Ils pli gronds gudagnaders dal boom èn ils plazzals navals (Werft) ed ils furniturs. Actualmain han las societads da navigaziun empustà tar plazzals navals en la Germania 12 bastiments da cruschera cun ina valita totala da 8,9 milliardas euro. Da la branscha da cruschera profiteschan en l'Europa il pli fitg l'Italia cun 4,6 milliardas euros e la Gronda Britannia cun 3,3 milliardas euros. La Germania è sin plazza 3 cun ina svieuta directa da radund 3 milliardas euros.
RR novitads 08:00