La Svizra ha evacuà fin uss 292 persunas cun connex svizzer or da l’Afganistan. 66 persunas èn anc a l’eroport a Kabul. Quellas persunas duain vegnir evacuadas en las proximas uras, ha communitgà il minister da l’exteriur, Ignazio Cassis, davant las medias . Tut ils collavuraturs locals da la Direcziun da svilup e collavuraziun (DEZA) possian uschia vegnir evacuads.
Aviun sa tschentà a Turitg
L'aviun da la Swiss ch'ha persunas a bord ch'èn vegnidas evacuadas da l'Afghanistan è sa tschentà la bun'ura a las duas a Kloten. Sis uras avant era el partì da Taschkent en l'Usbekistan. Fittà l'aviun aveva il Departament federal da l'exteriur.
Oriunamain era il sgol stà planisà per sonda passada. Pervi da la situaziun precara en la chapitala afgana Kabul han ins dentant stuì spustar quel.
Cumbats a l'eroport
A l'eroport da la chapitala Kabul en l'Afganistan haja dà cumbats. Ina persuna da l'equipa da segirezza saja morta. Trais ulteriuras persunas sajan blessadas, sco l'armada da la Germania ha annunzià vinavant. Ils cumbats haja dà tranter las forzas da segirezza afganas sco er schuldada tudestga ed americana ed attatgaders nunenconuschents.
Avant era vegnì enconuschent ch'ils Stadis Unids han engrondì la zona da segirezza enturn l'eroport. Quai ha il president american, Joe Biden confermà ad ina conferenza da medias. Ils Taliban hajan co-operà. En pli n'ha Biden betg exclus da prolungar l'acziun d'evacuar er suenter ils 31 d'avus. Oriundamain eri planisà che tuttas truppas americanas bandunian enfin lura il pajais.
