L'organisaziun mundiala da sanadad WHO ha infurmà davart sias examinaziuns davart il cumenzament da la pandemia da corona a Wuhan. I dettia novas enconuschientschas ha ditg l'expert da la WHO, Peter Ben Embarek. Quellas n'hajan dentant betg midà dramaticamain la vista generala.
En spezial saja fitg pauc probabel ch'il coronavirus saja sortì d'in labor chinais. Il virus saja plitost arrivà tar l'uman d'animals, probabel da l'utschè-mezmieur sur auters purtaders intermediars, ha ditg Ben Embarek. I dovria dentant anc ulteriuras examinaziuns per chattar la via exacta ch'il virus haja fatg.
A Wuhan eran il december dal 2019 vegnidas confermadas las emprimas infecziuns cun il coronavirus. Probablamain cursava quel dentant gia pli baud. Ils experts internaziunals da la WHO èn stads quatter emnas a Wuhan per tschertgar l'origin dal virus.
