Sur la Belgia, la Gronda Britannia e la Mar dal Nord sgolan las proximas duas emnas aviuns che duain purtar bumbas atomaras. Per il cas da sgarschur d'ina guerra atomara vegn il diever da bumbas atomaras exercità. L'exercizi duai contribuir tar il potenzial d'intimidaziun atomara da la NATO, di la pledadra Oana Lungescu.
Nagina muntada per la guerra en l'Ucraina
L'exercizi na stettia betg en connex cun la guerra en l'Ucraina. I sa tractia d'in exercizi che sa repetia mintg'onn. Il diever da bumbas atomaras cunter l'Ucraina vegn adina puspè discussiunà en la publicitad russa. Politichers dal Vest han reagì sin quai ed avertì la Russia. Il davos aveva il president franzos Emmanuel Macron dentant sclaus ina cuntrafrida cun ina bumba atomara, sche la Russia fetschia diever d'ina bumba atomara en l'Ucraina.
Passa 60 differents tips d'aviuns èn involvids tar l'exercizi. Las bumbas atomaras americanas che pon vegnir purtadas d'aviuns dal militar da pajais europeics vegnan prendidas ord il magazin e chargiadas. Sgulà vegnia, tenor experts, dentant senza las bumbas.
