Las memia chaudas temperaturas ed ils ferms vents han ussa dentant fatg in stritg tras ses plans.
Temperaturas chaudas han fatg in stritg tras il quint da Keller
Gia avant la partenza haja la gruppa stuì vesair en, che las cundiziuns na sajan betg propi optimalas. Igl è in dals pli chauds envierns enconuschents ed uschia n'èn ils fiords betg pli schelads. Perquai haja la gruppa stuì midar ruta e chaminar enstagl dad ir cun las schlittas da chauns l’emprima part.
In ulteriur problem da las temperaturas chaudas era, che la naiv è bler pli loma ed uschia sajan ins sfundrà tar mintga pass pli ferm ed haja survegnì er pes bletschs. Er la schlitta na sa laschava betg trair uschè bain tras la naiv frestga.
Lura èn vegnids ils vents
Malgrà las cundiziuns diras è la gruppa arrivada tar ils vadretgs. Là hai lura dentant dà in’auter problem natiral. Ferms vents han evità da pudair cuntinuar il viadi. Perquai è Ray Keller lura turnà enavos al lieu da partenza.
Enstagl da traversar l’ost da la Grönlanda ha Ray Keller uschia simplamain passentà dapli temp en il vitg da partenza. Expediziuns al lieu, chatscha dad urs polars u las forzas da la natira haja el pudì persequitar uschia pli intensiv ed era vegnir en contact cun ils indigens.
Perquai fa el in facit fitg positiv da sia expediziun.
RR actualitad 06:00