- En il parc da chemia a Leverkusen hai dà mardi bun'ura in'explosiun per motivs anc adina betg enconuschents.
- Tschintg persunas sajan mortas tar l'explosiun, han las autoritads communitgà. Duas persunas èn anc adina sparidas. 31 persunas èn vegnidas blessadas.
- Via in'app d'alarm è la populaziun vegnida avertida da «privel extrem».
L'explosiun saja capitada mardi curt avant las 10:00 en il deposit da tancs en il parc da chemia a Leverkusen. Pertge ch'i saja vegni ad ina detonaziun, n'è anc adina betg cler. Ils abitants e las abitantas dal conturn avevan las autoritads supplitgà da restar en stanzas serradas e da tegnair serrà fanestras ed ischs. L'Uffizi per la protecziun da la populaziun ha dà or il stgalim da privel «extrem aut». Enfin mezdi era il fieu stizzà e pir en il decurs dal suentermezdi han las autoritads schlià il stadi da privel extrem aut.