Siglir tar il cuntegn

Header

Chasas cun fem.
Legenda: La citad russa be muments suenter l'explosiun en la fabrica da muniziun. SRF
cuntegn

Explosiuns en Russia Puspè – 79 ferids suenter explosiuns en fabrica da muniziun

Pliras explosiuns en ina fabrica da muniziun en la citad russa da Dserschinsk causeschan almain 79 ferids. Las autoritads hajan proclamà il stadi d'urgenza, scriva l'agentura da novitads tudestga DPA.

Adina puspè causeschan explosiuns en fabricas d'armas russas bleras victimas. Questa giada è pertutgada la citad Dserschinsk cun radund 200'000 abitantas ed abitants, radund 400 kilometers en l'ost da Moskau.

Las autoritads hajan proclamà il stadi d'urgenza ed hajan dad annunziar ura per ura dapli persunas feridas, scriva la DPA vinavant.

En la fabrica pertutgada er'ins vi dad investigaziuns

Actualmain discurra l'uffizi da sanadad dad almain 79 persunas feridas (38 collavuraturs da la fabrica e 41 abitants da la citad). Morts na para dad avair dà nagins. Dal motiv per las explosiuns – observaders scrivan da duas fin trais – na sajan las autoritads anc betg s'exprimidas.

Cler è dentant, ch'in cumitè naziunal era vi dad investigar en la fabrica «Kristall» per betg n'avair resguardà las prescripziuns da segirezza.

Segirezza minimala na vegnia betg resguardada

En Russia dettia quai adina puspè talas explosiuns cun blers ferids e morts, scriva la DPA. Il motiv saja savens che gnanc las prescripziuns da segirezza las pli elementaras vegnian resguardadas tar la producziun.

Ultim'explosiun a Dserschinsk en avust 2018

Dapi il 2014 èn vegnids registrads en Russia radund in tozzel da talas explosiuns. A Dserschinsk sez eran vegnidas per la vita tschintg persunas avant gnanc in onn tar in'explosiun en in'autra fabrica che quella pertutgada actualmain.

RR novitads 17:00