Siglir tar il cuntegn

Header

cuntegn

Expo Milano 2015 Datlas e vestgadira permeabla per l’aria

Per cumportar las temperaturas autas che spetgan ils visitaders da l’exposiziun mundiala a Milaun durant ils mais da stad datti cussegls d’abitants da pajais arabs.

Uschia duess la vestgadira adina cuvernar tut il corp, però en moda ligera e largia e consister d’ina stoffa da mangola ch’è permeabla per l’aria. Fitg impurtant è er la protecziun cunter ils radis da sulegl.

Duas dunnas en vestgi nair
Legenda: Nora e Masuma sa protegian dal sulegl. RTR, A. Caprez

Nora e Masuma mettian adina si ina crema cun in factur da protecziun d’almain 30 han declerà duas giuvnas dal Catar.

Datlas èn il meglier

Per superar lungs viadis tras il desert duess ins mangiar fritgs setgs. Il meglier sajan datlas. Quellas na saduleschian betg, ellas sajan er fitg bunas per la circulaziun da las chommas, ha tradì Abdachman El Abrahim, in beduin che lavura durant tut l’ExpoMilano tar il pavigliun dal Catar. Perquai cusseglia el als visitaders da l’exposiziun da s’equipar cun tals fritgs. Sche pussaivel er betg baiver rauba memia fraida, il corp dovra numnadamain dapli energia per adattar la temperatura da la bavronda a l’atgna.

Artitgels legids il pli savens