Expo Milano 2015 en retard

Las lavurs da preparaziun da l'areal per l'exposiziun mundiala Milano 2015 na vegnian da raschun betg a fin sin l'avertura l'emprim da matg. Quai ha ditg il schef da l'Expo Giuseppe Sala. El saja dentant plain fidanza ch'ils visitaders na vegnian betg a remartgar quai.

in lavurer sin ina plattafurma è vid lutegiar Bild in Lightbox öffnen.

Legenda da maletgs: Las lavurs vid l'exposiziun mundiala Milano 2015 èn en cumplaina acziun. Keystone

Anc avant paucs dis aveva il primminister talian Matteo Renzi fatg in appell als responsabels da l'expo a Milaun da far in sprint final per terminar las lavurs ad uras.

6'400 lavurers èn permanentamain en acziun sin ils plazzals da l'exposiziun. Al primminister smanatscha ina blamascha era perquai ch'il pavillon talian na vegn probabel era betg a fin sin l'emprim da matg. Las lavurs da construcziun per il bajetg cun passa 10'000 meters quadrat n'èn anc betg a fin.

Tenor il manager Giuseppe Sala hajan els gia ademplì ina miracla sch'ins patratgia che las lavurs sajan stadas bloccadas per lung temp pervi d'inquisiziuns da corrupziun. L'onn passà èn 7 managers vegnids arrestads pervi da renfatschas da corrupziun.

Per Milano è quai la segunda exposiziun mundiala suenter il 1906. L'Italia spera che l'exposiziun carmalia blers turists. Il stadi ha investì 1,3 milliardas euros en l'expo ed investiders privats pajan 350 milliuns ed ina milliarda euros vegn dals pajais che sa participeschan.

RR novitads 12:00