Siglir tar il cuntegn

Header

cuntegn

Expo Milano 2015 Il diari: 01.05.2015

Oz è damai il grond di. L’avertura da questa ExpoMilano che ha fatschentà nus gia durant mais. L’accreditaziun, damai l’entrada per ils schurnalists, duess esser fatga. In mintga cas avain nus survegnì ina conferma da l’organisaziun. Schebain pir la saira avant.

Il badge per entrar a l'ExpoMilano.
Legenda: Il badge per entrar a l'ExpoMilano. RTR, A. Caprez

Suenter ina emprima odissea en la part sutterrana da la staziun da Rho Fiera per chattar finalmain il gist biro cun nossas accreditaziuns, han ils propi amiaivels gidanters da l’Expo declerà a nus, ch’els na chattan actualmain betg noss bigliets. Però, nus entrai tuttina a la exposiziun mundiala, simplamain cun in bigliet provisoric.

Ina giada passads tut las controllas da segirtad, inclusivamain il scannar da nossa rauba (perfin il cuntè da giaglioffa dad Armon è passà) è passada ina bun’ura.

Il Decumano cumenza a s'emplenir.
Legenda: Il Decumano cumenza a s'emplenir. RTR, A. Caprez

Finalmain dadensvart!

Arrivads sin il «Decumano», la via che maina atras tut l’areal da l’ExpoMilano, ed ha ina lunghezza da stgars 2 kilometers, cumenza noss viadi. Chaminond vers il pavigliun svizzer èn numerus auters anc vi da las ultimas lavurs preparativas. Singuls n’èn però gnanc anc pronts per avrir quest’emna.

L' act uffizial

L'act uffizial cun l'avertura da l'ExpoMilano 2015.
Legenda: L'act uffizial cun l'avertura da l'ExpoMilano 2015. RTR, A. Caprez

A mezdi lura la gronda festa d’avertura. Nus essans en il teater sut tschiel avert, adina puspè plovi in pau. Sco usità tar acts uffizials datti plirs pleds festivs da politichers ed uffizials, perfin il Papa s’annunzia directamain da Roma per salidas ils Milanais.

Il grande finale da la festa d’avertura è ina furmaziun d’aviuns che tiran las trais colurs talianas en l’aria sur noss chaus vi.

Il trotinet ha fatg ses serv, la plievgia er.
Legenda: Il trotinet ha fatg ses serv, la plievgia er. RTR, A. Caprez

Uss cumenza pir endretg nossa lavur!

La montascha ed ils tagls da tut quai che nus avain ramassà durant il di a l’Expo ha da vegnir elavurà. Perquai ina cursa a chasa (40 min. a pè!).

Per trametter datas en in volumen d’ina contribuziun da televisiun na basta la colliaziun en noss alloschi betg. Armon emprova da cuntanscher il center da medias pli spert cun il trottinet dad Anna. La plievgia è stada be in impediment l’auter è la controlla da segirtad che n’ha betg lubì d’entrar cun il trottinet.

Armon Schlegel vi da far la contribuziun per il TSG.
Legenda: Armon vi da far la contribuziun per il TSG. RTR, A. Caprez.

Finalmain ha però tut anc prendi ina buna fin e las duas contribuziuns èn rivadas anc a temp a Cuira per emetter.

Suenter la saira las 7 avain er nus finalmain pudì giudair noss ensolver, gentar e tschaina en ina.

Artitgels legids il pli savens