Finalmain durmì 7 uras en fila. Il viadi e las impressiuns dals emprims dus dis cun tschertgar alloschi, biros d’infurmaziuns, cun bleras impressiuns (en pliras linguas estras) han custà energia e gnervs !
Oz vain cuntanschì l’ExpoMilano per l’emprima giada via “entrata ovest Fiorenza” cun chaminar sur la passarella. Ina construcziun da 40 milliuns euros. Ella correspunda ad in sgrattatschiel cupitgà da varga 30 plauns ed ha in pais da passa 400 tonnas.
Rucki zucki
Nagin temp da spetgar tar l’ingress inclusiv la controlla da segirtad. Ubain ch’ins aveva fatg quint cun dapli visitaders, u bain che l’andament è speditiv (perfin en Italia ;)).
Nossa lavur schurnalistica cumenza tar il pavigliun svizzer che è situà gista sper la plazza principala da l’ExpoMilano, la Piazza Italia. Là vain nus inscuntrà l’anteriur regent, Claudio Lardi. El è in dals ambassadurs grischuns a l’Expo.
Suenter ina curta intervista ha noss viadi ans manà tar ils americans. Il pavigliun gigantesc cun segir ina da las pli grondas tablas da visita vid la fatschada!
Ina da las ideas ch’è restada a nus è quella d’animar la glieud da cultivar ed implantar salata, verdura ed ervas VERTICALMAIN en chaschas vid las paraids da las chasas
Proxim stop: il Giapun
Ina tabla avertescha ils visitaders ch’ins ha da far quint cun in temp da spetga da almain in’ura per entrar.
Nus na spetgain betg e giain a Monaco. Uschia sco ch’il stadi è, sa preschenta er il pavigliun. Numnadamain pitschen e stretg. Tranter containers e cistas da lain e da chartun sumeglia l’exposiziun ad in port da martganzia.
Dal virtual al real
En il pavigliun da Catar, meglier ditg en il palazi ans ha spetgà ina preschentaziun audiovisuala en trais dimensiuns, surtut per Armon in giudiment. El ha perfin sfeglià in cudesch virtual.
Tut auter che virtual èn stadas las datlas da Catar ch’in dretg beduin ha offrì ad Anna. Pertge ch’ins duess mangiar quels fritgs raquinta el en in’intervista ch’ins po udir proximamain sin questa pagina.
Slow Food – tut va pli plan
Arrivads giudim l’ExpoMilano vain visità la “Piazza della biodiversità” nua ch’ins ha pudì savurar ed engiavinar spezarias en stgatlas.
Durant noss viadi enavos vers chasa avain realisà ch’ins vesa mintga di novs pavigliuns che n’avevan dat en egl fin uss.