Era sche nus avain entant chattà ina colliaziun da bus in quart d’uretta davent da noss alloschi, resta il viadi magari lung. Il bus ans maina (cura ch'el riva insumma ina giada!) almain fin a la staziun da Rho.
Suenter vuli tuttina anc bun 30 minutas a pè da la staziun fin tar l'entrada da l'ExpoMilano.
L'emprima impressiun han ins al cumenzament da la via principala da l’Expo, il Decumano. Quella via ha ina lunghezza da stgars 2 km.
I
Inscunter cun in jauer
Cun quai che nus, ils svizzers èn er preschents a l’ExpoMilano, avain nus decis dad ir a dar in’egliada sin l’agen product. Las turs da vaider dad ina vart, da l’autra l’exposiziun dils quatter chantuns dal San Gottardo. Numnadamain il Valais, il Tessin, il chantun Uri ed il Grischun.
Ed a tgi inscuntra Anna là ? A l’anteriur moderatur dad RTR, Gian Fadri Conrad! El lavura ed abita durant tut l'exposiziun a Milaun.
Ses lieu da lavur savess anc daventar in pitschen tip secret cura che las temperaturas èn fitg autas la stad.
En il local nua ch'il monolit da 21 tonnas è exponà en furma da las alps, curra numnadamain adina aua, uschia che i resta bel frastg ed umid :)
A vul ina gronda purziun flexibilitad !
Cun tut il material ramassà avain nus s’installads en in pitschen biro provisoric en il pavigliun svizzer e taglià e preparà las emissiuns per RTR.
Cun quai che nus partin il local cun da tutta sort glieud, han ins dad ir in tschertga d’in local pli quiet en chasa per registrar noss texts. Entant che Anna ha savì scappar curt en il “salotto” (pauc temp pli tard han “Promis” giudì in apero en quel local) ha Armon gì da registrar ses text en in chantun cun tut las ramurs da telefons, il clac clac dal scriver sin la tastatura e portas che vegnan avertas e crodan cun in sfratg puspè en la serradira.
Finalmain temp per ulteriurs pavigliuns
Cun quai che pliras persunas avevan recumandà ina visita en il pavigliun austriac, ans ha manà nossa via directamain en in guaud muntagnard, nua che Armon ed Anna s’han sentids immediat da chasa.
Il messadi ch’il guaud signifitga ils pulmuns dal mund, vegn declerà en moda fitg simpla ed enclegentaivla.
Da nus datti ina fitg buna nota per la preschientscha austriaca. Preschentà bain e tutgà il tema sin la noda.
Dal rest: sche nus avessan reagì pli spert, vessan tut tenor er pudì far in’intervista cun Art Furrer. Fin che nus avevan però realisà tgi che sa zoppa sut il grond chapè da cowboy, era il Promi gia svanì en las rotschas da scolars che han visità oz l’ExpoMilano. (ac/as)